• सूचना विभाग दर्ता नं. ६२९/०७४-७५

‘प्रदेशको नाम सगरमाथा उपयुक्त’ : प्रमुख सचेतक राजभण्डारी

  • फाल्गुन १९, २०७४
  • सोलुखुम्बु समाचार
alt

सोलुखुम्बुबाट प्रदेशसभा सदस्य निर्वाचित बुद्धिकुमार राजभण्डारी एमाले संसदीय दलको प्रमुख सचेतक चयन भएका छन् । व्यवस्थापनमा स्नातक उनले २०३८ मा अखिल छैठौंबाट राजनीतिक यात्रा सुरु गरेका थिए ।
२०४० मा नेपाल कम्युनिस्ट पार्टीको चौथो अधिवेशनबाट जिल्ला सचिव निर्वाचित उनी २०४७ मा जनमोर्चाको जिल्ला सचिव भए । जनमोर्चाबाट २०४९ मा तत्कालीन सल्लेरी गाविसको वडाअध्यक्ष निर्वाचित राजभण्डारी २०५१ मा एमाले प्रवेश गरेका थिए । प्रदेशको विकास, अन्य दलसँग समन्वयलगायत विषयमा राजभण्डारीसँग लीलाबल्लभ घिमिरे र देवनारायण साहले गरेको कुराकानी ।

सगरमाथा भएको जिल्लाबाट प्रतिनिधित्व गर्दा कस्तो अनुभूति भएको छ ?

गर्व महसुस भएको छ । सगरमाथा भएको जिल्लाबाट प्रतिनिधित्व गर्दा जनताको हितमा त्यतिकै उच्च दृष्टिकोण लिएर काम गर्न प्रेरित भइएको छ । विश्वको अग्लो ठाउँ सोलुका जनताले पनि मलाई उच्च दृष्टिकोणसाथ जनताका पक्षमा काम गर्न निर्देश गरिरहेका छन् ।

संसदमा अन्य दलसँग कसरी समन्वय गर्नुहुन्छ ?
सबै दलसँग समन्वय गरेर सहमति र सहकार्यमा काम गर्छौं । सदनमा अत्यन्तै सदभावपूर्ण वातावरणमा अघि बढ्ने भूमिका निर्वाह गर्छु । दुई तिहाइ बहुमतलाई जनताको अपेक्षा पूरा गर्न उपयोग गर्छौं । दलको बैठकले दिएको निर्णयअनुसार सबैसँग सहकार्य गरेर अगाडि बढ्ने छौं ।

सोलुखुम्बुबाट आउँदा प्रदेशको भौगोलिक अवस्थालाई कसरी हेर्नु भएको छ ?
सोलुखुम्बुबाट विराटनगरसम्मको भौगोलिक अवस्था निकै फरक छ । संसारको सबभन्दा अग्लो ठाउँबाट यहाँ आउँदा कठिनाइ महसुस हुनु स्वाभाविकै हो । हिमाली जिल्लाको चिसोबाट यहाँको गर्मी र धूलो उड्ने ठाउँमा गाह्रो हुन्छ । अहिले अस्थायी प्रदेश राजधानी विराटनगर छ र स्थायी राजधानीका रूपमा अन्त कतै सारिए पनि इटहरीभन्दा माथि जाने अवस्था नभएकाले यहींको वातावरणमा मिलेर बस्नुको विकल्प छैन ।

प्रदेशको केन्द्रसँग जोडिन सोलुखुम्बुलाई कत्तिकोसहज छ ?
फाप्लु र लुक्ला–विराटनगर हवाई यातायात सुरु भएपछि एक हिसाबले नजिकै अनुभव हुनेछ । अब संघीय संरचनामा सडक यातायातबाट सोलुखुम्बुलाई यहाँसँग जोड्न सके खासै टाढा रहँदैन । बाटो नभएर र हवाईजहाज नचलेर कतिपय जिल्ला टाढा भएका हुन् । त्यसैले अब चाँडोभन्दा चाँडो हिमाल–पहाड–तराईका जिल्लाहरू सडक सञ्जालमा जोड्नतिर ध्यान केन्द्रित हुनुपर्छ । यति भएपछि हिमाल–पहाड–तराईबासीलाई संघीयताको साँचो रूपमा महसुस हुने छ । विराटनगर विमानस्थलबाट प्रत्येक जिल्लामा हवाई सेवा सञ्चालन गर्नुपर्छ ।

भारत–चीन जोड्ने सडकहरू कहिलेसम्ममा बनिसक्छ ?
प्रदेश र संघीय सरकारले काम गर्न थालेपछि २र३ वर्षमा सडकहरू निर्माण हुन्छ । सिरहाको माडर–मिर्चैया–कटारी–हलेसी महादेव हुँदै सुनकोशीको तिरैतिर चीनसँग र रानीदेखि किमाथांका सडकले भारत र चीन जोड्नेछ । नाम्चेको नाङपालादेखि सुरुङ मार्गमार्फत चीनको तिब्बत जोड्न सक्यौं भने त्यसको लाभ तत्काल लिन सकिन्छ । यसले हिमाल–पहाड–तराईलाई पनि जोड्न मद्दत पुग्छ ।

प्रदेश समृद्धिमा हिमाली क्षेत्रको उपयोग कसरीगर्न सकिन्छ ?
सोलुखुम्बुमा मात्रै वर्षेनी ७ लाख पर्यटक भित्रन्छन् । थ्रि स्टार होटलहरू खुलेका छन् । हजारौंले रोजगारी पाएका छन् । अबको ५ वर्षमा ७ लाख पर्यटकको संख्यालाई ७० लाख र्पुयाउन सक्ने प्रदेश सरकारको लक्ष्य हुनुपर्छ । त्यसका लागि सडक बाटो निर्माण गर्नुको विकल्प छैन । सडक सञ्जाल निर्माण गर्न सक्यौं भने पर्यटन व्यवसायले यो प्रदेश मात्रै होइन देश नै समृद्ध हुने दुई मत छैन । त्यसैले प्रदेश सरकारले ५ वर्ष्भित्रमा हिमाल–पहाड–तराई मधेसलाई सडक सञ्जालमा जोड्ने योजना प्राथमिकताका साथ ल्याएर कार्यान्वयनमा लग्नुपर्छ । अनि समृद्धि सहज हुन्छ ।

प्रदेशको स्थायी राजधानी र नामकरणबारे तपाईंको दृष्टिकोण के छ ?
विश्वको सर्वोच्च सिखर सगरमाथा भएको जिल्लाबाट प्रतिनिधित्व गरिरहेको र सगरमाथा शब्दलाई कुनै भाषा, धर्म, जात, क्षेत्रलाई छुँदैन किनकि सगरमाथाको देश भनेर नेपाललाई नै विश्वमा चिनिरहेको छ । त्यसैले यस प्रदेशको नाम सगरमाथा प्रदेश नै राख्नु उचित हुन्छ । प्रदेश राजधानीको विषयमा छलफल भइरहेको छ । विराटनगर, इटहरी र धनकुटालाई समेटेर लग्नुपर्छ जस्तो पनि लाग्छ ।

साभार : ईकान्तिपुर

सम्बन्धित समाचारहरु

प्रधानमन्त्रीले अध्य ...

काठमाडौं । सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्ड राष्ट्रपति विद् ...

सरकारले निर्णय गरेको ...

राष्ट्रपति विद्यादेवी भण्डारीले मन्त्रिपरिषदबाट सिफारिस भएको डेढ घण्टाभित्रै संसद अधिवेशन अन्त्य गरे ...

संसद अधिवेशन अन्त्य ...

सरकारले संसदको बजेट अधिवेशन आजै अन्त्य गर्ने निर्णय गरेको छ। प्रधानमन्त्री निवास बालुवाटारमा बसेको म ...

सामाजिक संजाल

सम्पर्क ठेगाना

सोलुखुम्बु समाचार डट कम

  • कम्पनी दर्ता नं. १६६७४८/०७३/०७४
  • स्थायी लेखा नं. ६०५९६८०३१
  • सूचना विभाग दर्ता नं. ६२९/०७४-७५
  • सोलुदुधकुण्ड नगरपालिका - ६, दोर्पू बजार, सोलुखुम्बु, सगरमाथा, नेपाल
  • सम्पर्क: ९८५१००९९८८, ०३८-५२०२८०
  • इमेल: [email protected]

हाम्रो टीम

  • प्रधान सम्पादक मनोजकुमार श्रेष्ठ
  • ग्राफिक्स, बजार उमेश

Copyright © 2019 / 2020 - Solukhumbu Samachar - All rights reserved